БЕОҐРАД – Канцелария за людски и меншински права Влади Републики Сербиї на ютре, 21. фебрура, з нагоди Медзинародного дня мацеринского язика у Беоґрадзе орґанизує пригодну програму, на хторей буду участвовац представителє националних совитох националнох меншинох, державних орґанох и институцийох, амбасадох, медзинародних орґанизацийох и медийох.
Спред Националного совиту Руснацох (НС) на ютрейшим означованю Медзинародного дня мацеринского язика у Беоґрадзе буду присуствовац членїца НС и предсидателька його Одбору за образованє Мелания Римар, членїца НС и директорка рускокерестурскей Школи „Петро Кузмяк” Хелена Пашо Павлович, директорка НВУ „Руске слово” Мартица Тамаш и школярка-рецитаторка Минеа Югас з Керестура, котра облечена до народного облєчива одрецитує єдну писню по руски.
Як сообщене з Канцелариї за людски и меншински права, з тей нагоди буду додзелєни и подзекованя медийом за доприношенє у медийней промоциї людских и меншинских правох у прешлим року.
– Сербия 2006. року ратификовала Европску грамоту о реґионалних и меншинских язикох, а з нагоди Медзинародного дня мацеринского язика ище раз жадаме указац же мацерински язик часц културного идентитету народа, точка препознаваня розчичносцох, алє и толеранциї и порозуменя – гвари ше у сообщеню з Канцелариї за людски и меншински права Влади Републики Сербиї.
Ютрейша шветочносц будзе на 11 годзин у Белавим салонє Палати Сербия, Бул. Михайла Пупина 2.