РУСКИ КЕРЕСТУР – У присустве осем зоз штернац членох, вчера у Руским Керестуре конституовани нови Одбор за културу Националного совиту (НС) Руснацох, хторому на чолє членїца НС Ґабриєла Саянкович з Руского Керстура.
Схадзка Одбору отримана у просторийох Дому култури, а после прилапйованя Дїловнїка о роботи, дзе у дискусиї винєшене же на шлїдуюцих схадзкох будзе предложене снованє и дзепоєдних фахових пододборох Одобру за културу, прилапени Календар манифестацийох Руснацох у 2015. року, подобни як и прешлорочни, з тим же до ньго тераз учишлєна и манифестация „Пришли нам Русадля” у Бикичу. Конєчну одлуку о Календаре принєше НС.
Прилапени и рамикови план роботи и финансийни план, хтори у одношеню на прешлорочни звекшани за 65 000 динари, односно же би цалосни буджет Одбору за културу у тим року виношел милион 715 000 динари. План роботи и финансийох директно повязани з витворйованьом спомнутого Календару манифестацийох, а попри 22-ох його програмних активносцох, планована и обласц духовна култура и други активносци, як и софинансованє видавательней дїялносци.
Першираз того року Одбор за културу предкладал розподзельованє средствох за софинансованє видавательней дїялносци на руским язику по Конкурсу Покраїнского секретарияту за културу и явне информованє, бо дотераз то робели окремни комисиї Секретарияту. Так предложени виноси за софинансованє видаваня кнїжкох и часописох по руски наших видавательох у тим року, а могло конкуровац за вєдно 3 милиони 340 000 динари, кельо спомнути секретарият опредзелєл за видавательну дїялносц рускей найциналней меншини-заєднїци. Конєчну одлуку о предложених сумох по тим конкурсу принєше Вивершни одбор НС.
Одбор за културу НС заключел же би ше до Покраїнского секретарияту за кулуру и явне информованє послало молбу же би убудуце, пре предкладанє розподзельованя средствох, до НС послал цалосну конкурсну документацию, як цо то пракса и з других секретариятох.
Одбор вчера прилапел препоруку Вивершного одбору НС же би ше зоз средствох за духовну културу по 50 000 динари опредзелєло нашим хором у Новим Садзе, Вербаше и Дюрдьове, алє з наглашеньом же би були обовязни участвовац на Хорским фестивалє „Карпати” у Вербаше.
Понеже до Одбору уж сцигли дзепоєдни вимоги за софинансованє означованя значнєйших рочнїцох КУД и орґанизацийох у тим року, предложене же би о финансованю означованя рочнїцох, як окремних збуваньох вонка з Календару манифестацийох, одлучовал НС Руснацох. Уж тераз Совиту предложене же би за тогорочну 25. „Ружову заградку”, попри порядних 25 тисячох, кельо за Фестивал намененєне у рамиковим финансийним планє Одбору за културу, позарядово опредзелєл ище 5 000 динари.