РУСКИ КЕРЕСТУР − На стреду, 16. януара з початком на 17 годзин у Ресторану „Червена ружа” будзе отримане едукативне викладанє за продуковательох паприґи котре орґанизує компания „Лукова” у сотруднїцтве зоз Здруженьом продуковательох паприґи „Капсикум анум” и Задруґу „Керестурска паприґа”.
Як визначую домашнї, викаданє будзе мац пейц цалосци − применьованє ҐЛОБАЛ ҐАП стандардох, орґанска продукция, модерна продукция и технолоґия, злєпшанє продуктивносци, и здравствени и мири безпечносци за очуванє околїска и доставанє здравого плоду.
Едукация ше реализує прейґ USAID проєкту за конкурентну привреду, а Руски Керестур єдно спомедзи 15 местох у нашей держави дзе ше го реализує. Едукациї потераз отримани у Раткове, Горґошу и Приєполю.
Компания „Лукова” занїма ше насампредз зоз преробком овоци и желєняви, а свойо продукти пласує на домашнє и иножемне тарґовище. Едукациї орґанизує пре подзвигованє свидомосци о ефикасней польопривредней продукциї з почитованьом стандардох, цо оможлївює лєгчейше пласованє польопривредних продуктох на иножемне тарґовище.