КОЦУР – У Коцуре на ютре будзе преславени значни ювилей – 250 роки образованя у тим месце, а Основна школа „Братство-єдинство” и Дзень школи. Централна шветочносц будзе на поладнє у велькей сали Дому култури.
Попри Шветочней академиї, на ютре буду и числени провадзаци активносци, як цо то подобова колония школярох у школским дворе на 10 годзин, а тиж на 10 годзин почню и спортски змаганя у физкултурней сали.
У учальньох и у голу Школи на 11 годзин будзе отворена вистава подобових роботох визначних малярох-бувших школярох коцурскей Школи, вистава старих фотоґрафийох, кнїжкох и наставних средствох, та вистава националних єдлох сербскей, рускей и мадярскей кухнї.