РУСКИ КЕРЕСТУР – Вчера дополадня ЯП „Завод за вибудов” Кула у центре Руского Керестура, на самим початку Русинскей улїци, положел знаки же ту тераз забранєне паркованє превозкох, цо нєсподзивало Керестурцох.
Паркованє забранєнє опрез Мензи, односно прейґ драги Здравствене амбуланти, цо будзе и найвекши проблем Керестурцом, як и опрез парку од Русинскей улїци.
У центре вше вельки обток гражданох, та и їх превозкох праве пре Здравствену амбуланту, апатики, блїзкосц Дому култури, церкви и други змисти у центре валалу, а ту ше паркує превозки и пре свадзби.
Як дознава Рутенпрес, знаки поставени без знаня Месней заєднїци, лєбо ЯКП „Руском”, а опрез Мензи ище вше стої и подлога за погосцительну лєтню заграду, за хтору Совит Месней заєднїци од инспекцийних службох вимагал же би ше ю склонєло, праве пре нєможлївосц паркованя опрез Здравственей амбуланти.
