ВЕРБАС – З нагоди Дня Општини Вербас и Дня ошлєбодзеня, нєшка, 20. октобра будзе отримана Шветочна схадзка Скупштини општини (СО) Вербас. Схадзка будзе у сали Биоскопу „Югославия” на 11 годзин.
На Скупштини буду бешедовац предсидателька СО Вербас Маряна Мараш, предсидатель Општини др Братислав Кажич, а як кажди рок, буду додзелєни и Награди Општини Вербас. Планована и проєкция филму и културно-уметнїцка програма.
Цалодньова програма з нагоди Дня Општини почнє на 9 годзин на теметове з кладзеньом венцох на памятнїк, потим на 9,30 г. венци буду положени на памятнїк Площа Червеней армиї, як и на Памятнїк погинутим борцом у центре городу – на 10 г., дзе будзе и културно-уметнїцка програма.
По Швяточней схадзки СО голу Биоскопу будзе коктел (на 12 годзин), а на 19 годзин у Подобовей ґалериї Културного центру Вербас будзе отворена подобова вистава „Єшеньски подобови салон 2015”.