РУСКИ КЕРЕСТУР – У Руским Керестуре прешлей соботи пред вечаром огень зоз запалєней кукуричанки у єдней загради у улїци ЮНА ше, пре витор, преширел на вецей сушедни загради, грожел шопи зоз шеном и тром обисцом – дознава Рутенпрес од заменїка командира Добродзечного огньогасного дружтва (ДОД) Михайла Папа.
Дзекуюци схопней интервенциї огньогасцох, котри и попри чежкого доходу, з огньогасним камионом на час дошли ґу огню, успишно є загашени и нє преширел на спомнути обєкти. Огень бул високи и до 10 метери, понеже горела суха трава.
Пре тот инцидент огньогасци поволую Керестурцох же би нє палєли отворени огнї, насампредз пре безпечносц, алє и надпоминаю же палєнє огня забранєне зоз законом як на полю, так и у заградох и обисцох и за його потупйованє предвидзени високи пенєжни кари.