КУЛА – Всоботу, 29. октобра, з пригодну програму и додзельованьом подзекованьох, у Кули означена 20-рочнїца снованя и постояня Руского Културно-уметнїцкого дружтва (РКУД) „Др Гавриїл Костельник”, на хторей присуствовали и члени тедишнього Инициятивного одбору за снованє Дружтва – Гелена Гафич Стойков и Мирон Гудак, та члени перших орґанох управяня пред 20 роками, познєйше и руководителє РКУД – Йоаким Бики, Янко Такач и Владимир Бучко, терашнї предсидатель Дружтва.
Попри членох РКУД з Кули и їх госцох з Дому култури Руски Керестур, на програми присуствовали и госци з других наших местох и представителє наших институцийох – народна посланїца и членїца Националного совиту (НС) Руснацох Олена Папуґа, секретар НС Руснацох и о.д. директора РНТ „Петро Ризнич Дядя” Таня Арва Планчка, о.д. директора Заводу за културу войводянских Руснацох Ивана Дудаш, редакторе у Радио Новим Садзе РТВ Златица Няради и Таня Беук Латяк, делеґация Рускей матки, на чолє з предсидательом Дюром Папуґом, як и предсидатель кулского КУД „Дурмитор” Милан Вукович.
През програму присутних водзела Амалия Ковач, а после єй привиту, з минуту цихосци дата почесц Мариї (Марики) Ани Барат, єдней зоз сновательох и активней членїци РКУД, котра ше упокоєла 26. октобра того року.
У пригодним реферату кратши историят и терашнї активносци у кулским РКУД винєсол його предсидатель Владимир Бучко, а потим уручени и 18 подзекованя поєдинцом и институцийом з Кули и других местох, котри допринєсли тирваню и роботи Дружтва Руснацох у Кули.
Подзекованя з нагоди 20-рочнїци РКУД „Др Гавриїл Костельник” достали перша предсидателька Дружтва Гелена Гафич Стойков, други и треци предсидатель Йоаким Бики и Янко Такач, члени РКУД Владимир Лазор, Владимир Жирош, Амалия Ковач, Цецилия Мудри, Еуфемия Планкош (Руски Керестур) и Александер Мудри, та поєдинци з других местох – Михайло Зазуляк и Мария Стрибер з Руского Керестура, Александра Лендєр з Вербасу. Члени Дзецинскей драмскей секциї РКУД Лендєровей и Ковачовей з тей нагоди придали и окремни дарунки.
Подзекованя достали и Национални совит Руснацох, Завод за културу войводянских Руснацох, Дом култури Руски Керестура, Руска матка, ОШ „Петефи бриґада” з Кули, Школа за основне музичне образованє з Кули и КУД „Дурмитор” з Кули, а на програми домашнїм на ювилею окреме повинчовали Дюра Папуґа и Милован Вукович.
У програми жридлово шпивацки ґрупи – Женска, Хлопска и Мишана РКУД „Др Гавриїл Костельник”, под руководительством Еуфемиї Планкош, як и Хлопска, Женска и Мишана жридлова ґрупа Дому култури Руски Керестур, котрих на гармоники провадзел Мирко Преґун, одшпивали по вецей руски народни шпиванки, а члени Рецитаторскей секциї Дружтва Лїляня Кнежевич и Дияна Канюґа по руски одрецитовали два писнї.