ШИД – Предсидатель Скупштини општини Шид Велимир Ранисавлєвич штварток, 15. децембра, на схадзки з руководителями КПД „Дюра Киш“ у Руским доме у Шидзе обецал же локална самоуправа финансийно поможе предлуженє роботох на вибудови помоцного будинку, чия вибудов почала пред штирома роками за будинком Руского дому.
Руководзаци Дружтва Ранисавлєвича поинформовали же би за законченє найзначнєйших роботох требало милион 50 000 динари, а предсидатель СО гварел же би роботи требало окончовац по часцох и же локална самоуправа, за початок, поможе же би будинок бул закрити, же би далєй нє препадал.
Ранисавлявич, котри у Руским доме бул вєдно з началнїком Општинскей управи Шид Ромком Папуґом, додал же о вимоги КПД „Дюра Киш“ поинформує и предсидателя Општини Предраґа Вуковича, и же ше Руснацом поможе ришиц спомнути проблем.
