РУСКИ КЕРЕСТУР – Вчера вечар на Драмским мемориялє участвовали аматере з Петровцох, з Горватскей, з представу Дюру Папгаргая „Два карти за Єрусалим”, у режиї Томислава Раца.
После премиєри початком того мешаца на домашнєй сцени, у Руским Керестуре було друге виводзенє тей представи Петровчанох, та було видно же єй хиби убавйованє и дорабянє, як у утвердзованю тексту, так и розбавйованю мизансцену, можебуц и дорабянє з музичнима ефектами, хтори похасновани лєм на концу представи.
Нєвельочислена керестурска публика з моцним аплаузом на концу представи потримала упарту и витирвали драмску роботу наших Руснацох у Петровцох, понеже драмска секция КУД „Яким Гарди” од конца 90-тих рокох прешлого вику тераз уж єдина хтора стаємно пририхтує и театрални представи, а остатнї 15-16 роки Петровчанє знова скоро каждорочни учашнїки на Драмским Мемориялє.
Награду за найлєпше одбавену улогу у представи достала Таня Гарди.