БЕОҐРАД – Влада Републики Сербиї принєсла Уредбу о розподзельованю стимулацийох у польопривредней продукциї и руралним розвою за 2015. рок и польопривреднїки годни конкуровац за вецей як 20 намени. Гевтих котри буду конкуровац за подзвигованє нових вецейрочних засадох овоци, виновей лози и хмелю, чека звекшанє субвенцийох до 55 одсто, понеже дотераз були 30 одсто
Максимални стимул за млєко будзе 7 динари по литри. За квалитетни приплодни млєчни крави, як и за крави за карменє, стимул будзе 25 000 динари по крави, а максимални порив за квалитетни приплодни овци, кози и швинї буду 7 000 динари по гарлу.
За родительски кури чежкого типу пориви буду 60 динари по кури, лєгкого типу 100 динари, док за родительски пульки порив будзе 300 динари по пульки.
Продуковательом котри маю приплодни матици потьки, держава будзе плациц 500 динари, а за приплодни матици пеструшки 300 динари по риби. За продукцию риби за костиранє порив будзе 10 динари по килограму випродукованей риби.
Стимулациї за карменє целятох буду 10 000 динари, а ягняткох и кощатох 2 000 динари по гарлу. За карменє швиньох порив будзе 1 000 динари, за крави-дойки 20 000 динари по гарлу, а пчоларе достаню 500 динари по кошнїци.
Основни субвенциї за продукцию рошлїнох буду 6 000 динари по гектаре, кельо и реґрес за гориво, лєбо гной.
Держава реґресує и премию осиґураня за шаца, плоди, вецейрочни засади, розсаднїки и животинї зоз 40 одсто премиї осиґураня, а за трошки одкладаня у явних маґазинох реґресовнє тиж будзе 40 одсто плацених трошкох.
Уредбу мож превжац и на сайту Општини Кула – www.kula.rs