САВИНЕ СЕЛО/КОЦУР – У ОШ „Бранко Радичевич” у Савиним Селу и ОШ „Братство єдинство” у Коцуре вовторок, 28. септембра отримани испити за лиценци у воспитно-образовней роботи на руским язику, хтори тераз здобули седмеро нашо наставнїки.
Практичну и теорийну часц покладали и успишно одбранєли – Любка Малацко з Руского Керестура, Марина Кухар и Владимир Бесерминї з Коцура, Єлена Салаґ з Дюрдьова и Весна Кухар з Нового Саду (Дюрдьов) з порядней настави, а з виборней настави лиценцу здобули Леона Олеяр зоз Савиного Села и Оля Яковлєв з Нового Саду.
Покладанє испитох орґанизоване у рамикох Покраїнского секретарияту за образованє, предписаня, управу и национални меншини/национални заєднїци, а попри представительох компетентних иституцийох з просвити и образованя, у составе комисиї за випитованє кандидатох на покладаню участвовал и др Янко Рамач и Ирина Папуґа з Нового Саду, та Мария Шанта и Михайло Надь з Руского Керестура.