Гуманитарна акция Нєдзеля Каритасу, з мотом „Зоз солидарносцу победзиме индивидуализем”, 11. децембра означена и у керестурскей парохиї св. оца Миколая, а до дзвончка за тоту нагоду назберани 23 120 динари.
У шицких штирох Службох Божих о. Михайло Шанта у казанї потолковал прецо значне думац и на других, так же и Каритас твори цала церковна заєднїца. Алє, тота свидомосц ище вше нє доходзи до велїх, а Каритас, и по папових словох – єден зоз слупох Церкви. Даровани прилоги до дзвончка буду похасновани праве за помоц фамелийом котрим то найбаржей потребне.
У просторийох Каритасу у Керестуре 11. децембра отримани и традицийни крачунски вашар и як гварели його орґанизаторе, волонтере Каритасу, бул барз добре нащивени.
На Вашаре могло купиц крачунски прикраски, лакотки, колачи и друге, а нащивителє як добродзечни прилог, тиж за людзох котрим то потребне, подаровали 3 660 динари.
ПОМОЦ ОСОБОМ У ПОТРЕБИ
Як дознаваме од координатора парохийного Каритасу Звонимира Малацка, попри спомнутих активносцох, Каритас ше намага помогнуц по своїх можлївосцох, тим цо потребне.
– Нєдавно зме з окремним трудом помогли єдней младей фамелиї з малим дзецком опремиц дом хтори достали и потребни ствари за дзецко, и ту ше велї парохиянє дзечнє одволали. Мали зме и акцию „Школски прибор”, а остатнї час потребна помоц и хорим у даяких помоцних средствох як цо ходалка, та зме набавели єдну хтору ше будзе видавац на реверс, а тиж и єдну специялну бициґлу за инвалидну особу. Купели зме их з пенєжу цо назберала и Школа у лоньскей гуманитарней акциї, помогли дакус и нашо майстрове, и други людзе през рок. З назбераних средствох, як и зоз Фонда солидарносци нашей Месней заєднїци, поможе ше и з нагоди Крачуна.
КРАЧУНСКА СПОВЕДЗ
Керестурска парохия ше на рижни способи пририхтує и за крачунске швето. Часц рихтаня то и св. Споведз, хтора була окреме за хорих и старих у їх домох, дзе ходзели споведац троме домашнї священїки. Традицийна Крачунска споведз за вирних у церкви була на швето Непорочне зачатиє, 8. децембра, дзе вєдно з домашнїма споведац помогли дзевецме священїки з околних парохийох.
Висповедало ше красне число вирних, алє дакус менєй як влонї. Нагоду за споведз велї хасную и на други днї по Крачун, а Споведз за школярох и младих будзе на нєдзелю, 18. децембра, од 11 годзин и под час дзецинскей Служби на 11,30 годзин.
Звонимир Джуня
Звонимир Джуня пре свою хороту мал потребу за специялну бициґлу. За помоц ше обрацел до Каритасу хтори му помогол дойсц до бициґли, и прето є барз задовольни и дзекує шицким цо у тим помогли, бо за ньго то будзе можлївосц же би вишол з обисца.