ДЮРДЬОВ – Вчера у ОШ „Йован Йованович Змай” у Дюрдьове школяре з висших класох руских оддзелєньох, школяре осмей класи сербского оддзелєня и школяре нїзших класох котри виучую руски язик, як и мишана ґрупа дзецох з дзецинскей заградки „Дюрдєвак” стретли ше з нашу писательку и редакторку „Заградки” Меланию Римар, котра представела свойо найновши кнїжки за дзеци, медзи нїма и у виданю НВУ „Руске слово”.
Госцинску и дзеци привитала наставнїца руского язика Мария Самарджич, а Римарова представела свойо кнїжки по руски и по сербски – Гайзибан на шпарґу”, „На крилима маште” и „Кец из удварања”, та на тих язикох и читани твори з кнїжкох.
Школяре на програми комуниковали з авторку ришуюци загадки, закончовали започати виреченя же би ше римовали, одвитовали на питаня, та за єден точни одвит школяр пиятей класи Лука Кухар од Римаровей на дарунок достал єй найновшу кнїжку по руски „Гайзибан на шпарґу”.
Попри спомнутих, представена и кнїжка „Як росли двойнята” Милутина Дюричковича, хтору Римарова зоз сербского преложела на руски язик.
На сходзе двоїм школяром котри поряднє посилаю свойо роботи до „Заградки” уручени награди, та награду за рисунок достала Лидия Чапко, а за литературни состав Сереґей Пап.
