ДЯКОВО (ГОРВАТСКА) – У Дякове, у Горватскей, вчера, 22. юния, умарла учителька у пензиї Цецилия Гаргаї (народзена Цап), котра зохабела вельки шлїд у нашей просвити и култури, насампредз у местох у Сриме.
Народзена є 1. юлия 1928. року у Коцуре, дзе закончела основну, а у Вербаше гражданску школу. Учительску школу закончела у Суботици 1948. року и такой достала роботне место учительки у Бачинцох, дзе попри школскей роботи була укапчана до рускей „Просвити“ у тим месце и учела и дзеци и страших руски танци и пририхтовала театрални представи.
З Бачинцох ше 1954. року одала за о. Владимира Гаргая до Петровцох, та пре його службу, єден час жила у Райовим Селє, дзе тиж робела з младежу, зазберовала Руснацох на бали, прадки и други програми, а з початком роботи у школи у тим месце 1958. року, уключела ше и до пририхтованя културних програмох.
Кед у обласци школства принєшени законски предписаня о образованю и на язикох народносцох, орґанизовала наставу руского язика у Райовим Селу, а нєодлуга и у Ґунї. Основала танєчну секцию з хтору успишно наступала на наших и других манифестацийох – на „Петровским дзвонє”, „Червеней ружи”, „Дяковских вишивкох”, „Винковских прадкох” итд. Вецей як дзешец раз зазберовала дзеци и приводзела их на лєтнї школи, дзе викладала мацерински язик.
Учителька Цецилия Цап Гаргаї за свою учительску и културно-просвитну роботу достала вецей припознаня, медзи хторима и „Наймилши учитель” (Београд, 1979), а у своїх здогадованьох надпоминала же любела дзеци як свойо власни, же их нє лєм образовала, алє ше старала и о їх виховованю. Вимагала од нїх же би були роботни, чесни, справедлїви и одвичательни и як таки виведла велї ґенерациї. Як пензионована просвитна роботнїца, Цецилия дзечнє и далєй помагала у просвитней у културней роботи.
Учителька Цецилия Гаргайова будзе похована нєшка, 23. юния, у Петровцох.