КУЛА – У двох кулских основних школох од 1. априла тирва упис за 140 першокласнїкох, кельо их будзе у идуцим школским року. Як виявели у школох „Иса Баїч” и „Петефи бриґада”, за тераз ище нєт вельке число уписаних, вироятно и пре потребну документацию хтору, пре гужви у здравствених установох, нє так єдноставно обезпечиц.
При уписованю родичи виполнюю и анкету о виборних предметох, медзи хторима понукнуте и пестованє руского язика.
До Школи „Петефи бриґада” ше уписую и школяре зоз сушедних местох пре наставу на мадярским язику, за котрих на тоту наставу орґанизовани безплатни превоз. Спомнута Школа шицким уписаним першокласнїком обезпечи и ташку зоз школским прибором.