НОВИ САД – У Ґалериї Союзу здруженьох подобових уметнїкох Войводини у Новим Садзе вчера вечар отворена вистава Владу Нярадия з Вербасу, з назву „Карпатски мит”. Виставу отворели сотруднїца у Здруженю подобових уметнїкох Корина Кубик и критичар мр Данило Вуксанович.
Як поведзене на отвераню, Няради по нєшка викладал на коло 600 виставох, а тота му 53. самостойна. На отвераню Вуксанович окреме визначел:
– Опатраюци словнїки символох наиходзел сом на рижни толкованя медведза. Перше його значенє то воскресенє, понеже ше на яр будзи зоз своїм потомком и представя нови живот. Медведзово мили места то пещери, дзе цмота, та ше вон повязує и з поджемнима силами. Тиж так, медведз символ моци и мужественосци и краль є животиньох у ґерманскей митолоґиї. За алхемичарох медзведз чарнїдло, перши стан материї. У преплєтаню випитуюцих визуалних поступкох, Няради применює и источашнє и меня димензиї формалного символу медведза – гварел, медзи иншим, на отвераню Вуксанович.
Вистава роботох Владу Нярадия у Ґалериї Союзу здруженьох подобових уметнїкох Войводини отворена по 11. юний.