НОВИ САД – Вчера у Новим Садзе почало витворйованє пилот-проєкту сепарациї комуналного и амбалажного одпаду, та на поджемних контейнерох тераз єст налїпки з упутствами дзе хтори одпад треба руцац.
– Упутство то и молба гражданом же би уж у обисцу роздвоєли одпад и потим руцели до под`жемних контейнерох, хтори буду ясно означени за комунални и амбалажни одпад. До комуналного одпаду спадаю остатки єдзеня, одпад зоз заградки (загради), ґар, пелюхи, вата, як и други мишани, ткв. „мокри одпад”. Амбалажни одпад то ПЕТ и пластична амбалажа, тетрапак, картон и папер, склєняна амбалажа, конзерви, односно ткв. „сухи одпад”. Кед нє знаю дзе треба руциц одредзени одпад (а нє амбалажа є), най го руца до мокрого – потолковала портпаролка ЯКП „Чистота“ Даниєла Янков.
Сепарацию одпаду надпатра комунална полиция и инспекциї хтори нєсовисним гражданом котри нє буду мерковац дзе цо руцаю, буду виписовац пенєжни кари од 8 000 динари.
ЯКП „Чистота“ новосадским основним школом у ширшим центре городу тиж подзелєла канти за сепарацию одпаду, а за школярох пошвидко будзе орґанизовац преподаваня и роботнї о одкладаню одпаду.
У обласци управяня з одпадом Сербия єдна з найгорше пласованих державох у Европи, а праве тота обласц значна за предприступни прегварки за членство у Европскей униї.