ПРЕШОВ (СЛОВАЦКА) – У Прешовским краю ше влонї народзели 9 586 дзеци, цо найвецей у шицких самоуправних крайох у Словацкей, преноши портал „русинФОРУМ” информацию державней аґенциї ТАСР, достату у прешовскей филияли Статистичного уряду.
У одношеню на рок пред тим, число живих новонародзених дзецох звекшане за 234, а вецей народзени хлапци як дзивчата – 50,8 одсто.
Найвецей дзеци ше народзели у прешовскей општини – 2 094, потим у општини Кежмарок 1 155, а у попрадскей општини 1 069. Найменєй дзеци прешлого року ше народзели у општини Медзилаборци – 98.
Прешовски край ма примат и по найменшим числу дзецох народзених нє у малженстве – 28,2 одсто, мацери штреднє маю 28, а першородки 26 роки.
Остатнього дня 2015. року Прешовски край мал 820 697 жительох, цо 15,1 одсто цалосного жительства Словацкей и з найвекшим є природним приростком. Позитивну приросток бул у општинох Прешов – 758 особи, Кежмарок 540, Сабинов 372, Стара Любовня 92 и Левоча 5.
На другим боку, у Прешовским краю зазначени и найвекши миґрацийни рушаня, так же у 2015. року число жительох зменшане за 1 670 особи. Одселєли ше 4 047, а до Краю ше приселєли 2 377 особи. До Прешовского краю ше споза гранїцох Словацкей приселєли 725, а звонка єй гранїцох ше одселєли 549 особи.
Найвецей ше преселюю до Прешова, а пре рижни причини найвецей ше виселюю з општинох Вранов над Тополю (268 особи), Гумене (243) и Бардейов (222), док найвекше зменшанє числа жительства пре природни одлїв и висельованє зазначени у општинох Гумене – за 410 и Снїна, за 254 особи.