АПОСТОЛСКИ ЕҐЗАРХАТ – З нагоди Крачуна по григориянским календаре, апостолски еґзарх за грекокатолїкох у Сербиї, владика Георгий Джуджар упутел шлїдуюцу винчованку:
– Шицко цо створене – то дїло Божей любови и з ню диха. Божа любов ше розлїва на шицких и на шицко. У тей любови милосердиє Боже нам послало на жем свойого Сина Єдинородного, же би нас нє лєм нащивел, алє же би постал єден з нас, же би, одкупююци чловека з власци диявола, указал и доказал безгранїчну любов ґу чловекови. Исусово Рождество – то конкретне Боже обявенє людского спашеня, то Його циха казань о конкретней любови ґу нам.
– Исус ше родзи же би бул занавше з людзми, же би нас прейґ Голгофтскей жертви ознова врацел до обняца любяцого Бога Оца, алє и же би нас поволал на сотруднїцтво и партнерство у обнови Божого царства на жеми. Кажди поволани же бизме прейґ власней любови и милосердия участвовали у тим сотруднїцтве ратованя чловечества.
– То нє терха котру нам Бог наклада, то радосц даваня и жертви по прикладу самого Новонародзеного, котри сходзи на жем у нашим людским целу и враца ше у нїм, алє уж одкупеним и побожественим. Зоз своїм родзеньом од Пречистей Дїви Мариї, Друга Особа Пресвятей Тройци, воплоцени Син Божи, очолююци людски род, приводзи чловека до дому Оца Нєбесного и остава з нїм до конца викох.
– Дух Рождества Христового най вше панує у наших шерцох, же бизме були чувствительни и подзековни за Божу любов и милосердиє ґу нам! Нє допущме ше спреведац краткотирвацим жемским „райом”, нє падайме на спреведаюци обецунки того котри спричинєл таки Божи интервенциї и нє робме нїч у одсутносци и без участвованя Бога у нашим спашеню! Прилапме за основу нашого жемского живота Божу науку и приклад милосердия нашого Спасителя.
– Рождество Христово – то швето любови, котра принєшена на жем з приходом Новонародзеного и спонукує и нас на каждодньово нукашнє духовне родзенє! Порушує нас на обнову чловека, фамелиї, нациї, держави, цалого швета… Рождество Христово нас поволує же бизме почитовали шицки Божи створеня, а понад шицкого, же бизме пестовали и чували тото цо у нас найвреднєйше – чистоту души и шерца през покаянє и милосердиє, у любови и пребачованю.
– Саме народзенє Исуса нєповторлїве, алє нашо духовне родзенє вше потребне, нє лєм у крачунским чаше, алє стаємно, цали живот през нашу виру, през сполньованє християнских обовязкох, а окреме през Божествену Литурґию.
– Рождество Христово то вельке и глїбоке таїнство и нєвичерпне жридло з хторого можеме черпац духовни ласки. Воно вична инспирация любови Божей ґу шицким створеньом, а окреме ґу чловекови. Насампредз, воно натхнуце милосердносци ґу своїм ближнїм, котра нас порушує и дава моци буц подобни Оцови, яки шицких полюбел и шицким є Милосердни Оцец.
– Най нас и тото Рождество Христове, у Року Милосердия Божого, виведзе з цмоти до шветла кед зме заблукали, най нас духовно вилїчи кед зме захорели и зєдинї нас з духовну фамелию – Церкву Христову! А дух Рождества най вично пребува у наших душох, у наших домох и фамелийох. Христос Раждаєтся! Славите Єго!
+ Георгий
Ваш владика