ВЕРБАС – Роботнїки Явного подприємства за превоз путнїкох „Вербас” знова штрайкую пре нєвиплацени плаци за єденац мешаци, як и пре нємпожлївосц же би точели гориво пре длуство спрам НИС-у.
Як вчера гварел предсидатель синдикату у тим ЯП Предраґ Балетич, гоч дзепоєдни його колеґове почали вожиц, нєизвесне кеди явни превоз будзе нормализовани.
– Ище вше нєт догварки, обецане же нам тих дньох будзе уплацени даяки пенєж, бо тераз час за наплацованє мешачних картох – гварел Балетич за новосадски „Дневник” и додал же планую пойсц до Беоґраду на розгварку з министром за роботу Александром Вулином, котри даскельо раз наявйовал же придзе до Вербасу.
– Кед нє посцигнєме даяку догварку, радикализуєме протест и зоз штрайком з гладом – гварел Балетич, як и же у тим ЯП штрайкує 81 роботнїк.
Предсидатель Општини Милан Ґлушац за „Дневник” скорей потвердзел же локална самоуправа нє ма длуства спрам того подприємства, алє же воно длужне добавячом и же проблем з нєвиплацованьом плацох настал кед роботнїки одлучели тужиц свою фирму.