НОВИ САД – Участвованє младих у роботи школских одборох и транспарентносц у трошеню школярского пенєжу була тема першого Округлого столу, хтори орґанизує Уния штредньошколцох Сербиї, а хтори отримани всоботу, 7. марца у Скупштини Городу Нови Сад.
На сходзе участвовали вецей як 30-еро представителє школярских штредньошколских парламентох з рижних войводянских школох, а дискутовало ше о проблемох з хторима ше зочую представителє школярох. Заключели же можлївосци участвованя у приношеню одлукох нєпрецизно дефиновани, та пракса розлична од школи до школи – док у даєдних представителє школярох ровноправни у приношеню одлукох, у даєдних такей пракси анї нєт, а школяре жадаю же би и їх глас бул значни у приношеню одлукох у школи.
Бешедоване и о школярскому динару и його значносци за економску стабилносц образовних установох, а школяре визначели же у велїх школох нєт транспарентносци у трошеню того пенєжу и нє ясне им за цо ше го троши.
Як наявене з Униї штредньошколцох, идуци Округли стол будзе 14. марца у Кралєве и Новим Пазару.