РУСКИ КЕРЕСТУР – Штредня школа зоз домом школярох „Петро Кузмяк” тих дньох почала свою промоцию пред уписом за нови школски рок на три свойо напрями – а ґимназия общого типу на руским и сербским наставним язику и фахови напрям туристично-готелиєрски технїчар.
Як за Рутенпрес виявела директорка Школи Хелена Пашо Павлович, пре специфичну ситуацию того року промоцию школи, дому школярох и шицкого цо вони понукаю мушели присподобиц. Понеже нєт можлївосци за нащиви школярох фокусирали ше на виробок двоязичних плакатох, як и на видео-материял и унапрямели го на дружтвени мрежи (сайт и фейсбук Школи) и локални медиї дзе буду презентовани цали май.
Тот материял порозношели по школох у кулскей, вербаскей, а у планє и у оджацкей општини, бо уж традицийно зоз тих штредкох и найвецей школяре приходза на школованє до Руского Керестура.