„МЕСТО БОБАЛЬКОХ” (СИРОВИ И ВЕҐАНСКИ/ПОСНИ РОЛАТ З МАКОМ)

автор Владимир Бодянец 21. децембер 2016

Потребне за цесто:

1 шолька* урми (12-15 фалати, швижи, нє заляти з цукром)

1 шолька млєти мандулї або орехи (швижи)

1 ложка млєтого лєнового зарна

2 ложки розпущеного кокосового олєю (нє муши, алє будзе лєгчейше резац).

Потребне за фил:

1 шолька млєтого маку

2 ложки розпущеного кокосового олєю

1/3 шольки кокосового млєка

2 ложки сирупу з аґави, меду (увага – нєвеґанска опция!), або яворового сирупу

Надпомнуце:

* 1 шолька = коло 240 мл

Способ приготовйованя:

Цесто:

Повинїмац маґочки зоз урмох. Кед же су сухши, намочиц их у жимней води и познєйше одцадзиц. Мандулї/орехи зомлєц на машинки або у блендеру и вимишац зоз лєном. Окреме зомлєц на дробно, поджамиц урми и помишац зоз мандулями/орехами и лєном же би ше направело цесто. Кед же цесто пребарз мокре або лїпкаце, додац ище мандулї/орехи, а кед є сухе, доляц ложку-два води. Цесто би мало буц компактне и нє розпадовац ше, так же би ше го могло розогнац медзи двома превиднима фолиями. Положиц до фрижидера най ше охладзи, дас 10-15 минути.

Фил:

Вимишац шицки состойки за фил и ровномирно розмасциц по цесту. Хаснуюци сподню фолию закруциц ролат и охабиц у фрижидеру най ше охладзи и стиднє голєм 2-3 годзини, а идеално цалу ноц.

Готови ролат посипац зоз маком, резац и єсц. (Добре, нє муши место бобалькох, мож и попри нїх.) :)

(Опатрене 182 раз, нєшка 1)

НАПИШЦЕ УПЕЧАТОК