ПРЕШОВ (СЛОВАЦКА) – Тот 2017. рок будзе „Рок Адолфа Добрянского”, з нагоди 200-рочнїци народзеня того визначного русинского народного будителя, алє и особи котра ше закладала за права Словацох у тедишнєй Угорскей, сообщели представителє Округлого столу Русинох Словацкей (ОСРС) на прес-конференциї отриманей у просторийох Словацкого синдикату новинарох 28. децембра прешлого року, информує лем.фм.
Одлуку о преглашеню 2017. рока за „Рок Адолфа Добрянского” ОСРС принєсол ище 2. априла прешлого року, а о тей широкей акциї Русинох у Словацкей у тим року на спомнутей конференциї за новинарох бешедовали предсидатель русинскей платформи Милан Пилип и портпарол ОСРС Петро Медведь.
Адолф Добрянски бул и перши посланїк у Угорскей скупштини за Висшу Угорску и на тей функциї ше закладал за права Русинох и Словацох, а о його приятельским одношеню зоз Словацами шведочи и факт же бул єден зоз сновательох Матки Словацкей.
У „Року Адолфа Добрянского” буду орґанизовани рижни активносци и пре цо векше информованє явносци о тей визначней историйней подоби, а централна програма будзе у родним месце Добрянского, у Рудлове (у старим будинку парохиї) и у Чертижним, дзе є поховани, а активносци буду орґанизовани вєдно з Матку Словацку.
Предвидзене же и рижни културни програми и манифестациї Русинох у Словацкей у тим року буду у знаку 200-рочнїци народзеня Адолфа Добрянского, а у тим напряме на прес-конференциї представени и лоґо „Року Адолфа Добрянского” (по русински и по словацки), автора Доминика Бироша, хтори ше будзе хасновац на шицких активносцох.
У „Року Адолфа Добрянского” Театер Александра Духновича обнови и свою представу сучасного словацкого драматурґа Карола Горака, з назву „Адолф Иванович Добрянски”.