НОВИ САД – НВУ „Руске слово” своїм читачом дарує першу диґитализовану кнїжку Установи котру можеце безплатно зняц зоз того линку.
Слово о леґендарней кнїжки на котрей росли ґенерациї руских дзецох, єдней з перших сликовнїцох по руски „Тидвик – добродушни єлень”, америцкого автора Теодора Cус Ґайзела (Dr Seuss) зоз 1953. року, у прекладзе Миколи Кочиша.
Диґитализованей сликовнїци ше баржей годни зрадовац дїдове и баби, алє при читаню наглас вона нє менєй интересантна унуком. И родичом ше очи годни зашвициц.
Зоз тим дарунком сцели зме пребудзиц носталґию при трох ґенерацийох, а тиж так през читанє специфично написаней приповедки – до ученя руского язика.
Зоз диґитализованьом тей кнїжки, НВУ „Руске слово” розпочина єден длугорочни процес планованого диґитализованя своїх виданьох, котри з часом будзе доступни на нашим сайту.