Привредна комора Сербиї ше заклада за моцнєнє сотруднїцтва з Україну и заєднїцки укладаня у обласцох продукциї и реализациї нашеньскей роби, интензивних польодїлских културох, вибудови силосох и поживових капацитетох, польомеханїзациї и роби широкого трошеня, будовательних материялох и опреми, овоцових древкох и виновей лози, вибудови драгох и сотруднїцтва у транспорту и транзиту.
На отвераню трецого Дїловного форума „Сербия-Україна” на 84. Медзинародним польопривредним сайме у Новим Садзе, подпредсидатель Покраїнскей влади Дьордє Миличевич наглашел же сотруднїцтво тих двох державох ознова рошнє, у чим вельке доприношенє дава и Автономна покраїна Войводина.
– Вкупна робна черанка АП Войводини з Україну у 2016. року досцигла коло 64 милиони долари, цо скоро за 14 одсто вецей як рок пред тим. Медзитим, то ище далєко од черанки 2013. року, хтора виношела вецей як 172 милиони долари, односно черанки 2008. року од аж 240 милиони долари – гварел Миличевич.
По його словох, добре тото же ше Україна нашла медзи 25 жемами, чийо ше компаниї на Польопривредним сайме представели директно, бо то найкратша драга до потенциялних купцох и будуцих партнерох.
ВАЖНИ НЄПОШТРЕДНИ КОНТАКТИ
– Сиґурни сом же нєпоштредни стретнуца привреднїкох зоз розличних державох, як цо тоти, помагаю витвориц цилї. Потенцияли за звекшанє робней черанки єст у продукциї патосових облогох, фармацеутскей индустриї, древовей индустриї, петрохемийним комплексу и другим.
Окреме значна обласц за преширенє сотруднїцтва то польопривреда, по хторей Автономна покраїна Войводина позната, и представя аґрарно найрозвитшу часц Сербиї. Покраїнска влада вельо укладала до польопривреди, а так будзе и убудуце. Укладаня у тогорочним буджету найвекши у одношеню на предходни роки – потолковал подпредсидатель Покраїнскей влади Дьордє Миличевич.
Роздумуюци о можлївих и присутних проблемох, подпредсидатель Привредней комори Сербиї Мирослав Милетич гварел же то транспорт на релациї Україна – Сербия, царинска процедура и ускладзованє сертификатох.
– Саям праве место и час за таки форум и дїловни стретнуца. Медзи иншим, Войводина представя и вельки потенциял у орґанскей продукциї – наглашел предсидатель Привредней комори Сербиї Бошко Вучуревич.
Ширше патрено, Комора ше заклада за моцнєнє сотруднїцтва з Україну и заєднїцки укладаня у обласцох нашеньскей роби, интензивних польодїлских културох, вибудови силосох и поживових капацитетох, польомеханїзациї и роби широкого трошеня, будовательних материялох и опреми, овоцових древкох и виновей лози, вибудови драгох и сотруднїцтва у транспорту.
ЗАЄДНЇЦКА ЕВРОПСКА ОРИЄНТАЦИЯ
После бешеди предсидателя ПК Сербиї Бошка Вучуревича, у своїм привитним слове подпредсидатель При вредней комори України Валерий Кароль констатовал же и Сербия и Україна европски ориєнтовани, и зоз позитивнима резултатами у сотруднїцтве.
– Праве таки стретнуца оможлївя же бизме звекшали вкупну тарґовинску черанку. Україна тераз у пошвидшаним процесу приватизациї, цо тиж нагода за злєпшане и звекшане привредне сотруднїцтво Сербиї и України – гварел подпредсидатель Кароль и заключел же би инвестициї могли буц и векши.
Початком юния о инвестицийох бешедовал и сербски министер привреди Ґоран Кнежевич, кед виявел же влонї у Сербиї було вецей як 1,9 милиярди евра странски инвестициї. По його словох, держава ище интензивнєйше будзе потримовац инвестициї, зоз политику стимулованя, алє и зоз обезпечованьом сиґурного дїловного амбиєнта.
Свой бизнис у Сербиї розвиваю и дзепоєдни шветово бренди як цо „Шуберт”, „Джонсон електрикс”, „Леони”, „Делфи”, „Кромберґ” и велї други.
Людзом у каждодньовим живоце, односно меншим поднїмательом, важне и тото же малим и штреднїм подприємством у Сербиї, дзекуюци Европскей униї и Влади Сербиї, тераз доступни вецей як 500 милиони евра вигодних кредитох през фонди ЕУ.
Олександр Александрович, амбасадор України у Сербиї, на Дньох українскей култури у Новим Садзе
ПИЯЦ ЗОЗ 45 МИЛИОНИ ЖИТЕЛЬОХ
О держави и привредних потенциялох Сербиї на Форуму присутних поинформовала и Даниєла Чабаркапа, заменїк директора сектора за економски одношеня з иножемством, а Україну подробнєйше презентовал Валерий Кароль.
Гварене же тарґовище України отворене за шицки продукти и за робу зоз Сербиї нєт огранїченя лєбо завадзаня у пласману. Робу мож пласовац на тарґовище дзе жию 45,2 милиони жителє, почитуюци основни предусловия дїлованя: квалитет, цену, квантитет и континуитет випоручованя.
По анализи фахових службох Привредней комори Сербиї, заключене же, цо ше дотика спискох польопривредно-поживових продуктох, за хтори треба плациц царину у транзицийним периодзе, нє требало би наступац пребарз рестриктивно.
У тим смислу, ПКС предклада же би ше на рестриктивни список обовязно положело етил-алкогол. Окрем того, по препорученю нашей Комори, треба розпатриц модалитети огранїченя за млєко у праху, масло, конзумни кромплї, рафиновани цукер и вино.
Участвуюци на стретнуцу українских и наших привреднїкох, амбасадор України у Сербиї Олександр Александрович гварел же и попри чежкосцох, тераз заш лєм лєгчейше путовац на релациї Сербия – Україна, а авио вязи Києв – Беоґрад указую и же ше вше ефикаснєйше лєци.
О правней потримовки бешедовал Владимир Рибич, представнїк Привредней комори України у Сербиї, Македониї и Чарней Гори.
– Даваме потримовку у правней реґулативи и сотруднїцтве вообще. Може нам ше явиц кажда компания, а окреме мали и штреднї подприємства, бо вельки углавним и сами найду драгу и промоцию на тарґовищу – обнародовал Владимир Рибич.
ЧЕРАНКА ИСКУСТВОХ ПРЕ ВОЙНУ
За дружтвено-економски розвой важне и здравє, цо вец баржей можу вихасновац нашо фаховци у тей обласци и такволаних помагацких фахох. Так на поволанку нєвладовей орґанизациї зоз Днїпропетровска, милионского городу на востоку України, Центер за воєну трауму з Нового Саду прилапел поволанку же би орґанизовал и отримал тродньову едукацию и презентацию своєй роботи.
Психолоґове хтори участвовали на едукациї, вєдно 22 особи, пришли зоз шейсцох українских городох: Днїпропетровска, Запорожя, Києва, Харкова, Львова и Житомира. У Дружтве психолоґох Сербиї обнародоване же як резултат заєднїцкей тродньовей роботи, ушлїдзела и нова поволанка же би ше предлужело сотруднїцтво през едукацию українских фаховцох хтори гварели же сцу присц до Нового Саду на дальшу едукацию и одредзену файту фаховей пракси у Центре за воєну трауму.
ОБУКА У СЕЛЕНЧИ
Центер за орґанску продукцию „Селенча” од 30. мая по 1. юний бул домашнї фармером з України, хторим фаховци тей орґанизациї преноша знаня и искуства з орґанскей продукциї. Источасно, то идея и о можлївим подобним сотруднїцтве зоз продукователями и фаховцами з наших местох, дзе жию Руснаци.
У стретнуцох у Селенчи участвовали и фаховци з України, Словацкей и Польскей.