ПЕТРОВАРАДИН – Обнова фасадох на хижох у подгороду Петроварадинскей твердинї почнє того року, преноши портал 021 вияву директора Заводу за защиту памятнїкох култури Нового Саду Синишу Йокича. За тоту роботу того року буду опредзелєни 100 милиони динари, а у наступних ище 200 милиони за ушоренє обєктох, цо будзе тирвац вецей роки.
У городскей управи потвердзене же перша часц средствох за тоту намену обезпечена у републичним буджету и уж су на рахунку спомнутого заводу, з чим Република помага Новому Саду як Европскей престолнїци култури 2021. року.
Завод за защиту памятнїкох култури виробел акцийни план за обнову 45 обєктох у Петроварадину, а директор Йокич потолковал же держава будзе плациц обнову фасадох, цивох за дижджовку и закрицох, а власнїки задлужени за ушоренє нукашньосци будинкох.
Як гварел Йокич, на яр би мали буц розписани тендери за виводзачох роботох, а перше ше будзе робиц у Беоґрадскей улїци.