РУСКИ КЕРЕСТУР − Вчера, 6. децембра, у Руским Керестуре и других местох општини Кула отворени апатики „Ґален фарм” у просторийох дакедишнїх державних апатикох. Робота була понукнута перше шицким бувшим занятим, цо векшина и прилапела, а лїки на белави рецепт буду видавац од фебруара.
Як за Рутенпрес потолковала керестурска апатикарка Валентина Войчена, лїки з позитивней лїстини (на белави рецепт) годно подзвигнуц аж од початку фебруара, док подпишу контракт зоз державу у януару, понеже су новоотворена єдинка.
− Медзитим, свидоми того проблему, служба апатики будзе орґанизовац превоз лїкох зоз їх кулскей єдинки котра роби уж роками, так же за рецепти котри буду придати рано, лїки ше достави до вечара, або найпознєйше до ютра − потолковала Войченова.
Попри тим, апатики „Ґален фарм” з териториї општини Кула учашнїки акциї Кулскей сениорскей карточки, з котру за пензионерох обезпечую дополнююце зменшанє ценох за 10 одсто.
После завераня державних апатикох у шицких населєних местох општини Кули, а котри робели у рамикох Дому здравя Кула, Општина Кула розписала Явну оглашку на основу котрей видати шицки просториї апатикох.
Як закупец з найлєпшим понуканьом „Ґален фарм” зоз Земуну превжал на себе обовязку отвераня шицких тих апатикох и запошльованя роботнїкох котри ту були заняти, цо и випочитоване. Найчежша ситуация була у Крущичу и Липару, понеже там державни апатики були єдини, а после їх завераня гражданє по лїки путовали до сушедних местох.
У рамикох Дому здравя Кула зоз роботу предлужела робиц лєм єдна апатика у Кули, цо и нєобходне за функционованє тей установи. После завераня апатикох, шицки заняти ше могли опредзелїц за надополнєнє у форми одпремнїни понеже остали без роботи як технолоґийни звишки.