РУСКИ КЕРЕСТУР – Вчера у Руским Керестуре отримане преподаванє о заградкових рошлїнох, наводньованю, минералних гнойох и прикармйованю тих културох, у орґанизациї Здруженя паприґарох. Презентацию рижних брендох керестурским заградкаром отримали представителє фирми „Аґриматко” з Нового Саду.
Нащивителє були преважно продукователє капусти, карфиолу, диньох, ґереґох и паприґи, та презентере дали увагу тим рошлїном, а представели рижни гибриди. Спомедзи поведзеного, найменєй слова було о паприґи, бо файти хтори нашо паприґаре найвецей садза, „Аґриматко” нє понука.
Було слова и о уплїву залїваня „капка по капка” на продукцию, а представени и файти пантлїкох, та потолковане за хтори файти рошлїнох хтори пантлїки найлєпши.
Преподаванє мал отримац и професор з новосадского Польопривредного факултету Владан Маркович, алє пре оправдани причини нє пришол, та орґанизаторе наявели же вон будзе бешедовац на преподаваню 10. фебруара.
Шлїдуюце преподаванє хторе орґанизує Здруженє паприґарох „Капсикум анум” будзе на вовторок, 27. януара.