РУСКИ КЕРЕСТУР – У Основней школи „Петро Кузмяк” од пондзелку 15. юния по стреду 17. юний, отримани Закончуюци испит за школярох осмих класох, котрих у тим школским року єст 22.
Пондзелок школяре робели тест зоз мацеринского, односно руского язика у нашей школи, потим шлїдуюцого дня писали тест зоз математики, а треци дзень, односно вчера, робели тест зоз вибраного предмету за хтори ше школяре опредзельовали у децембру.
Од предметох виберали – биолоґию, хемию, физику, ґеоґрафию або историю, та ше у нашей школи по двойо школяре опредзелєли за физику и хемию, шесцеро ше опредзелєли за ґеоґрафию, а 12 за биолоґию. Каждого дня, шицки 22 школяре приступели покладаню Закончуюцого испиту хтори им нєобходни же би заокружели основношколске образованє.
Прелиминарни резултати закончуюцого испиту буду на пияток 19. юния, и теди школяре прейґ порталу Моя штредня школа годни oпатриц резултати, а кед буду мац даяки зауваги годни видзиц и тест и дац пригварку.
У зависноци од того чи пригварка оправдана, вона будзе або прилапена або прешлїдзена на комисию, та вец на пондзелок, 22. юния, буду обявени конєчни резултати.
Шлїдуюцого дня, вовторок и стреду, 23. и 24. юния, будзе пополньованє лїстини жаданьох, хторе годно окончиц онлайн, тиж прейґ порталу Моя штредня школа, або нєпоштредно у школи.
Конєчни резултати, односно информация о тим хтори школяр до хторей школи розпоредзени, буду обявени 29. юния, а потим 1. и 2. юлия будзе упис до штреднєй школи. Прияву за упис тиж мож поднєсц онлайн, прейґ спомнутого порталу Моя штредня школа, або по приходу до школи до хторей ше школяр уписує.