Кед зме з Якимом Канюхом обишли памятнїки на Дуклї, предлужели зме до Польскей, до места Зиндранова, а циль нам бул обисц музей Лемкох/Русинох наволани „Загорода”. Музей на отвореним полю свойого дїда справел Федор Ґоч, 85-рочни чловек доброго здравя. Упознали зме ше з Федором, його супругу и сином, хтори нам приповедал як музей почал будовац, як го подзвигнул перше зоз власнима средствами, а вец му помогла и держава. Но, бешедовали зме и о шицким, та и о тим кельо раз го загарештовали польски власци лєм прето же є Лемко/Руснак, и як после Другей шветовей войни Лемкох/Русинох розсельовали до далєких крайох Польскей, або України. Ми му подаровали нашо новини, компакт диски з рускима шпиванками и кнїжки, а вон нам дал на дарунок кнїжку хтору сам написал о своїм живоце у Зиндранове, и о тим цо нам приповедал, о спомнутим розсельованю. Бешеди би було хто зна докля, алє ми того дня мали сцигнуц до Ждинї на фестивал, так же зме ше сердечно розишли и обецали же кед нас здравє потрима, стретнєме ше ознова.
Велїм познате же ше Фестивал „Лемковска ватра” отримує три днї и то єден з найкрасших Фестивалох Лемкох/Русинох нє лєм у Польскей, алє бим повед, можебуц и од шицких фестивалох хтори ше отримує у Словацкей, України, Сербиї, Горватскей и других жемох дзе жию Русини, Руснаци и Лемки.
Влонї на фестивалу участвовали и нашо аматере з Руского Керестура, як и Миклошевчанє зоз Горватскей, та зме ше и ми ґу нїм придружели.
Трецого дня фестивала, там коло вечара, людзе помали одходза до своїх домох, но, велї цо там пребували под шатрами або у камп хижкох, остали ище дзнь-два, а аж вец же розишли. Стретли зме нашого доброго приятеля Михала Иванца зоз Снїни, та зме вєдно пошли до ньго дому и там остали даскельо днї.
Уж бул вечар кед зме сцигли, дакус зме ше дружели зоз домашнїма, а вец пошли одпочинуц, бо зме ютре сцели упознац и пообиходзиц тот край.
ПО ВАЛАЛОХ ОСТАЛИ ЛЄМ СТАРШИ ЛЮДЗЕ
Народни парк „Полонина” под защиту Унеска, а находзи ше у Снїнским округу и мож повесц, же ше опера на польску и українску гранїцу. Були зме на штучним озеру Старина и видзели як ше отамаль цага воду и зоз ню подмирює цали снїнски край и околни вароши. Предлужели зме до Тополї, до места и хижи дзе ше народзел Александер Духнович. У тей хижки дараз бул Музей, но нєшка тота хижка досц запущена.
Бешедовали зме и з людзми, гваря нам же су Руснаци, грекокатолїки, лєм же уж прешли на нови календар, а Службу Божу провадза на своїм язику.
Зашли зме до мойого приятеля Василя Цапа, хтори жиє у Снїни, под саму польску гранїцу. Там барз красни бреги и лєси, душу дало за одпочивок. Руснаци там маю свою церкву, православней су вири, а у церкви Службу Божу служа на старославянским язику. Людзе углавним польопривреднїки, маю вельки пасовиска, надосц статку и велї робя у лєше як лєсоруби.
У Руским Потоку тиж жию Руснаци. Обишли зме прекрасну православну церкву Михайла Архангела з половки 18. вику. То мале место змесцене под самима брегами. Нажаль, у нїм остали лєм старши людзе, дзеци им пошли на роботу до векших варошох, а велї и до иножемства. Зашли зме и до места Улич дзе на отворним просторе у єдним парку поставена мини ґалерия древених церквох снїнского реґиону. Шицки тоти краї цо зме обишли маю добри драги, добри пасовиска за статок, лєси, алє индустриї нєт.
УКРАЇНСКИ ПИСАТЕЛЄ МАЮ МУЗЕЙ
Рушели зме до України, до Ужгороду, дзе зме ше стретли зоз професором Иваном Хлантом хтори бул у Войводини 2007. року позберац и записац по наших местох стари народни шпиванки, коляди и дзецински шпиванки. После седем рокох пребуваня у наших крайох, удало му ше 2014. року видац прекрасну кнїжку з народнима шпиванками – „Писня над Дунаєм”. Там зме стретли и паноца Мирослава Жироша хтори там жиє и ма свою парохию, а вец предлужели до Мукачева и Хусту. У Колашеве Иван Хлант народзени, а у школи поставел музей познатих закарпатских писательох. Тот музей прекрашнє ушорени и требало нам досц часу же бизме шицко поопатрали.
Кед зме ше врацели до Словацкей, зашли зме до места Червенова до мойого приятеля Емилияна Курти, лєсарского инжинєра у пензиї, з хторим зме ше упознали 2005. року на паломнїцтве по Закарпатю. У тим месце жию Руснаци чийо ше предки 1751. року приселєли до Керестура и Коцура. Обишли зме Русинску православну церкву и зашли на теметов. На памятнїкох були презвиска: Тимко, Тамаш, Балоґ, Молнар, Лендєр, Рац, Микита, и велї други хтори єст и по наших руских валалох. Бешеди нїґда конца, а понеже було уж и позно, мушели зме рушиц до Словацкей, и обецали же ше пошвидко увидзиме.
Ютредзень зме пошли до варощику Гумене. Вон барз крашнє ушорени, а окреме музей Сканзен на отвореним дзе поставена древена церква зоз 18. вику, як и иконостас Михаила Архангела. Там мож видзиц вельо древени хижи и як ше у нїх дараз жило, як випатрал ковальски мигель, кушнїр, бочкораше…
Час швидко лєцел и ми уж мушели рушиц дому. Зашли зме ище до єдних приятельох у Земплинских Топлицох, и дознали же ше тот валал дакеди волал Керестур. Там жию фамелиї Тутаково и Бачово дзе зме ше дакус затримали. Валал ма 1 500 жительох, два церкви, єдну римокатолїцку, а другу грекокатолїцку. У Топлицох вєдно жию Словаци, Руснаци и Роми. Зложни су, ходза до истого дружтва, и до истей школи. У тим месце жителє старши, и мож чуц же бешедую як нашо стари у Коцуре. Достали зме на дарунок кнїжку у хторей записана история того валалу, та и тото же ше там народ населєл у 16. вику зоз шаришскей обласци.
Сцигли зме до Кошицох и Мишколцу, а вец през Мадярску предлужели по Руски Керестур и Нови Сад. Покус вистати, алє полни упечаткох и виполнєтих шерцох.
„ВАТРА” З МОЙОГО УГЛА
Фестивал „Лемковска Ватра” у подножю Брегох (Бескидох) на отвореним, так же ше там одходзи и зоз шатрами, камп хижками, а и на автобусох. Млади ше до позних годзинох дружа каждого вечара. През дзень себе людзе вонка рихтаю єдзенє и видно же ше источасно и одпочиваю и уживаю. Кажде хто там пойдзе, може купиц рижни прикраски, кнїжки на лемковским-руским язику, компакт диски з народнима и забавнима шпиванками, малюнки зоз старого краю… Народ на тот Фестивал приходзи з України, Словацкей, Мадярскей, Сербиї, Горватскей, Канади, САД, а найвецей, розуми ше, єст Поляцох хтори, гоч и оддалєни од Ждинї 500 километри, на „Лемковску ватру” приходза каждого року. Гваря – нєт нїч милше як стретнуц ше зоз своїма краянами.
(Конєц)
