Миґранти жадаю пойсц до Заходней Европи, а Сербия муши буц порихтана же єдно число тирвацо останє у Сербиї и же ше интеґрує до нашого дружтва. А пред тим маю звладац язик, присподобиц ше ґу нашому дружтву, та буду мац право и на роботу.
Представнїки општини Шид и городу Лозница, як и Комесарияту за вибеженцох и миґрациї, штири днї препровадзели у Союзней Републики Нємецкей, у Берлину и Нирнберґу. Там дзе ше мали нагоду упознац як у їх держави чече процес интеґрованя миґрантох и спатриц їх искуства хтори годно применїц и у Сербиї. Свойо искуства винєсли на округлим столє, дзе присутних хтори ангажовани на миґрантских питаньох у шидскей општини, упознали цо там видзели и чули.
У Нємецкей були предсидатль општинского Совиту за управянє з миґрациями и помоцнїк предсидателя општини Шид, Ивица Йович, а у мено городу Лозници заменїк городоначальнїка Радован Дивнич.
Дивнич упознал присутних же Баня Ковиляча ище у дакедишнєй СФРЮ мала центер за азилантох, хтори отворени 1983. року, и може прияц 100 особи.
– Ми тот центер прешлого лєта адаптовали, пременєли тишлїрай, ушорели кухню и набавели нову судзину, а тераз у нїм змесцени 120 миґранти. Кед будзе потреби, на розполаганю нам и воєна касарня хтору ше нє хаснує. Сербия як держава порихтано дочекала миґрантску кризу, Влада Сербиї потримала приход миґрантох, точнєйше їх транзит и гумане третированє. Миґранти жадаю пойсц до Заходней Европи, а кельо останю у Сербиї, нє знаме. Мушиме буц порихтани и на тото же єдно число миґрантох тирвацо останє у Сербиї и прето нам значни поступок їх интеґрованя до нашого дружтва – наглашел Радован Дивнич.
Вон винєсол и податки же под час пребуваня у Нємецкей чули же тота держава потераз интреґровала 460 000 миґрантох зоз факултетом и ище 260 000 зоз штредню школу, односно ремеслом, вони достали роботу, и вецей су нє на терхи держави.
Ивица Йович наглашел же у Нємецкей достали значни искуствия тей держави хтори мож похасновац и у Сербиї и же подобни сходи, як тот у Шидзе, будзе и у других штредкох у Сербиї, односно општинох и городох у хторих змесцени миґранти.
– Хто з миґрантох достал азил у Нємецкей, там останє найменєй шейсц роки, а и после того часу вони ше нє враца до Сербиї. Миґранти хтори поглєдаю азил у Сербиї и после одредзеного поступку го и достаню, треба их интеґровац до нашого дружтва. То значи, же тота особа будзе мац право и на роботу, як и домашнї дежавянє и приявиц ше на Националну службу за обезпечованє роботи. Пред тим муши вшелїяк звладац язик и присподобиц ше ґу нашому дружтву – гварел Ивица Йович.
Йович и Дивнич наглашели и же миґрантски питаня на уровню Нємецкей реґуловани зоз союзним законом, и же азил углавним достали миґранти зоз Сириї, Ирану, Ираку, Еритреї и Сомалиї. Миґранти у поступку интеґрованя муша одслухац 600 годзини на курса нємецкого язика и ище 100 годзини упознац ше зоз правну систему, историю и културу Нємецкей. Як гварене на сходзе, Нємецка потераз уложела аж два милиярди еври до процесу интеґрованя.
Представнїки Комесарияту за вибеженцох и миґрациї Сербиї, хтори задлужени у мено держави за поступок интеґрованя миґрантох, винєсли податок же порихтани предписаня (уредбу), хтору треба же би вигласала Влада Сербиї и у хторей обсяжно написани поступок и мири хтори ше запровадзує у интеґрованю. Вони винєсли и податок же од початку 2016. року по тераз, у Сербиї азил достали коло 40 миґранти, а у поступку о додзельовану азилу одлучує Министерство нукашнїх дїлох и тот поступок може тирвац и даскельо мешаци.
ЗАПРОВАДЗЕНИ МИРИ ОХРАНИ
Др Крсто Куреш, директор Дома здравя у Шидзе и главни координатор здравствених службох хтори даваю здравствену помоц миґрантом, поинформовал присутних же запровадзени такволани штварти круг третированя миґрантох з одредзенима препаратми процив ушох по целу, и же шицки препатрени достали нови чисти шмати.
