РУСКИ КЕРЕСТУР – З обрядом ламаня славского колача, хтори окончели школяре штреднєй школи „Петро Кузмяк”, вчера у Керестуре почала Шветочна академия з нагоди школскей слави у Сербиї – Дня св. Сави.
Академия отримана у школским голу, дзе присутним просвитним роботнїком и велькому числу школярох керестурскей Основней и штреднєй школи з домом школярох швето повинчовала директорка Хелена Пашо Павлович.
Найзначнєйши податки зоз живота и дїялносци св. Сави, защитнїка школох и просвити, родоначальнїка сербскей култури, просвити, духовносци и Церкви, школяре на сербским и руским язику представели през виривки з його биоґрафиї и леґендох, а у голу Школи пририхтана и пригодна вистава.
Академию з удатнима музичнима точками прикрашела шпивацка ґрупа штредньошколкох и школяре керестурского оддзелєня Школи за основне музичне образованє (ШОМО) з Кули.