НОВИ САД – Цали тиражи двох розкошних сликовнїцох за дзеци „Фарби” и „Родзини” у виданю Новинско-видавательней установи „Руске слово”, коло 500 прикладнїки, розпредати за менєй од єдного мешаца.
Кнїжки були на популарней Миколайовско-крачунско-новорочней акциї од 30 одсто и кажда коштала лєм 210 динари.
То нови рекорд у предаваню кнїжкох НВУ „Руске слово”, а окреме було вельке поєдинєчне интересованє и онлайн купованє тих двох кнїжкох за наймладших.
НВУ „Руске слово” нє мало у плану заробиц у предаваню тих кнїжкох, алє обезпечиц же би кажда фамелия могла до пакецика дзецом положиц сликовнїци, котри на уровню високобуджетского квалитета вельких видавачох у жеми, як и усадзовац дзецом одмалючка любов ґу литератури по руски.
„Фарби” илустровала Аня Гудак, а „Родзини” Мария Ковачевич, док писнї написали Оксана Мудри Недич, Наташа Еделински Миколка, Ана-Мария Рац, Даниела Тамаш, Златка Чизмар, Кристина Шепински, Марина Дудаш и Марина Тодич, а под редакторством Меланиї Римар.