РУСКИ КЕРЕСТУР – На рочней Скупштини Атлетского клубу (АК) Русин, хтора у Руским Керестуре отримана внєдзелю, 14. децембра, за найлєпшу атлетичарку Клубу у 2014. року преглашена Кристина Катона (2002), котра ше змага у скаканю до висока у конуренциї младших пионирох.
На Скупштини з окремну плакету наградзени атлетичар Дарян Белак (1999), котри ше змага у обегованю у вецей дисциплинох, того року у конкуренциї старших пионирох, нарок будзе у младших юниорох, и на рижних змаганьох дотераз освоєл велї медалї.
Атлетски клуб на Скупштини наградзел и Ивана Будинския, котри ше з посцигнутима резултатми визначел у руцаню кулї и копиї и як вецейбоєц, а окреме похвалєна хлапцовска школска екипа, котра того року освоєла перше место на СОШОВ (Спортска олимпияда школскей младежи Войводини) и друге место на Державним першенстве у атлетики.
Звит о роботи на схадзки Скупштини винєсла длугорочна тренерка у АК Саня Тиркайла, а бешедоване о орґанизациї роботи у Клубе, членстве и злєпшаню условийох за роботу. Визначене и же з младима атлетичарами того року як тренер почал робиц и дакедишнї успишни член Клубу, нєшка студент на Факултету за физичну културу у Новим Садзе Борис Барна.
