КАНАДА/МЕКСИКО/ЗАД – Шветове першенство у фодбалу почало штварток, 11. юния, а будзе тирвац по 19. юлий, кед ше одбави фельке финалне стретнуце, на стадиону Метлайф у Зєдинєних америцких державох.
Тот Мундиял, историйни, 23. турнир понеже го першираз орґанизую три держави (Канада-Мексико-ЗАД), а участвує рекордне число екипох, аж 48 репрезентациї. На тим першенству, нажаль, нє участвує репрезентация Сербиї, понеже нє виборела пласман у квалификацийох.
То друге Шветове першенство, после Япону и Южней Кореї 2002. року, хторе орґанизує вецей як єдна держава.
Формат змаганя: Репрезентациї подзелєни до 12 ґрупох по 4 екипи. Два першопласовани екипи зоз каждей ґрупи и осем найлєпше трецопласовани екипи прейду до нокаут фази, хтора почнє зоз шеснацтину финала.
Стретнуца ше бави у 16 городох хтори подзелєни до трох реґийох:
ЗАД – 78 стретнуца (и финалне стретнуце), Нюйорк, Далас, Лос Адєлес, Маями, Сиєтл, Сан Франциско, Хюстон, Атланта, Бостон, Филаделфия и Канзас Сити.
Канада – 13 стретнуца, Ванкувер и Торонто.
Мексико – 13 стретнуца, Мексико Сити, Ґвадалахара и Монтерей.
На Шветовим першенству єст и нови репрезентациї, по першираз ше на закончуюцу часц пласовали Зеленортски острова, Йордан, Курасао и Узбекистан, док Курасао постал наймєнша држава по поверхносци и чишлє гражданох хтора ше дакеди пласовала.
Урядова лабда за першенство представена 2. октобра 2025. року и ноши назву „Трионида”, а ма значенє три и габа. То 15. лабда хтору дизайновала компания Адидас за Шветови першенства од 1970. року.