РУСКИ КЕРЕСТУР – За рускокерестурске Здруженє паприґарох „Капсикум анум” прешли рок бул успишни, а у тим року плановани подобни активносци як и влонї – Днї керестурскей паприґи, жимски преподаваня и едукативни путованя, оглядна продукция, а роздумує ше и о нових подняцох – заключенє на вчера вечар отриманей Скупштини Здруженя.
О позитивним финансийним билансу, поробеним и планох, о ситуациї зоз субвенциями и конкурсами за продуковательох, як и о того року барз вельким понуканю опреми, вельке число присутних паприґарох на Скупштини поинформовали предсидатель и члени Управного одбору Здруженя Владимир Варґа, Душица Орос и Славко Малацко.
Тогорочна манифестация Днї керестурскей паприґи будзе 13. и 14. авґуста, предочене же буду звекшани оглядни поверхносци под гибридом паприґи „каптур”, як и же нєодлуга за паприґарох буду орґанизовани едукативни путованя до Краґуєвцу и Мадярскей. Тирваю и жимски преподаваня за паприґарох, тиж у орґанизациї Здруженя.
Як гварел предсидатель Здруженя Владимир Варґа, розрабя ше и нову идею о продукциї пресади у Керестуре, цо би ше реализовало аж у 2017. року.
З уплацованьом 1 000 динари членарини на Скупштини прияти и нови члени до Здруженя, а констатоване же того року членарину уж уплацели 90 члени, док влонї 70. Интересантне же керестурске Здруженє ма членох и зоз сушедних местох – Кули, Крущичу, Лалитю, та аж и з Бачкого Петровцу.
На рок, шлїдуюца Скупштина будзе и Виберанкова.