КОЦУР – У просторийох церковней сали Грекокатолїцкей церкви Успения Пресвятей Богородици у Коцуре, як и у церковней порти, внєдзелю, 28. априла, отримани традицийни Вельконоцни вашар у орґанизациї парохиялного Каритасу Марийов дом.
Од ранших годзинох парохиянє мали нагоду нащивиц церковни просториї и видзиц рижнородне понукнуце котре за тоту нагоду порихтали числени домашнї викладаче, алє и викладаче зоз околних местох.
Того дня нащивителє могли купиц рижни вельконоцни прикраски, венчики, аранжмани зоз квеца, ручни роботи, домашнї колачи и резанки, алє и уж вицифровани писанки. Окрем того, парохиянє могли купиц и приготовени, крашнє прикашени паски за наиходзаце швето.
На Вельконоцним вашаре участвовали и числени Каритасово волонтере, як и наймладши котри на Малей роботнї Каритасу зоз вироучительку Ксению Бесерминї и другима волонтерами направели рижни прикраски и предмети за предай. Часц заробеного пенєжу наймладши опредзелєли за гуманитарни потреби.
Числени парохиянє нащивйовали церковни просториї през цали дзень, по 20 годзин, покля викладаче були там, а полни мещки з котрима ишли дому були знак же и тогорочни Каритасов Вельконоцни вашар бул наисце успишни.
