ҐОСПОДЇНЦИ – У Основней школи „Жарко Зренянин” у Ґосподїнцох вчера на годзини руского язика з елементами националней култури, як виборного предмету, отримана програма у рамикох 10. манифестациї „Поетски нїтки Меланиї Павлович”, хтору орґанизує Дружтво за руски язик, литературу и културу (Дружтво).
На годзини пречитани стихи Меланиї Павлович, а шицки школяре од Дружтва на дарунок достали по кнїжку на руским язику и Подзекованє „Мелания Павлович”.
И у Ґосподїнцох дзеци и рисовали, а подобови материял им подаровала Подобова колония „Стретнуце у Боднарова”, хтору Дружтво орґанизує праве у Ґосподїнцох.
Годзину отримала наставнїца руского язика Ана-Мария Рац, а попри Ирини Папуґа спред Дружтва, на програми присуствовал и директор ґосподїнскей ОШ Дарко Вранешевич, котрому Папуґова подаровала припознанє з подобу Миколи М. Кочиша.