НОВИ САД – У театралней сали Ґимназиї „Лаза Костич” у Новим Садзе вчера, 1. децембра, почал 15. Фестивал малих сценских формох „Дюра Папгаргаї”.
Госцох на Фестивалу, заменїка покраїнского секретара за културу, явне информованє и одношеня з вирскима заєднїцами др Небойшу Кузмановича и помоцнїцу покраїнского секретара за образованє, предписаня, управу и национални меншини-национални заєднїци Милинку Хрчан, привитал Миломир Шайтош, заменїк предсидателя Рускей Матки, а Фестивал отворел помоцнїк покраїнского секретара за културу Зоран Лазин.
Шветочносц на початку Фестивала прикрашела Хлопска шпивацка ґрупа Руского културного центру, хтора одшпивала штири шпиванки.
Перши фестивалски дзень бул у знаку перформанса „Под образом” Владимира Кочиша, а нєшка и ютре, буду виведзени ище три сценски витвореня.