НОВИ САД – У пейдзешатим чишлє новинох „Руске слово” у рубрики Тижньовнїк мож пречитац текст же отримана дзевята схадзка Националного совиту и треца схадзка Одбору за информованє.
У рубрики Нашо места єст обвисценє Керестурцом о одкладаню шмеца, текст о тим же Макайово з Коцура од Министерства за старанє о валалє достали средства за купованє хижи и текст о означованю Дня ошлєбодзеня Шида у Другей шветовей войни.
У рубрики Економия тексти о продукциї риби у Руским Керестуре и о Качи Дражич з Дюрдьова и єй квецарнї.
У рубрики Култура и просвита тексти о промоциї моноґрафиї „Войводина и єй Русини – о язику, култури и историї войводянских Русинох” слависти др Томаша Квоки и o манифестациї „Днї Миколи М. Кочиша”, хтору орґанизовало Дружтво за руски язик, литературу и културу.
У рубрики Людзе, роки, живот текст о Любици Чордаш зоз Миклошевцох, хтора жиє у Канади. У рубрики Духовни живот текст о тим же у парохиї св. оца Миколая у Руским Керестуре, на треци дзень Крачуна, 27. ецембра, будзе точно 25 роки як запровадзена Служба Божа за младих и дзеци у новим термину – на пол дванастей.
На бокох рубрики Спорт тексти о тим же у Новим Садзе у рамикох 32. Спортских бавискох „Яша Баков” бул турнир у пикаду, у Руским Керестуре у Спортскей гали тирва жимски турнир у малим фодбалу, як и о успихох Желька Яньканя з Нового Саду у дзвиганю ґирї (Kettlebell по анґлийски, ґиря по русийски, лєбо русийски дзвон, куля од желєза зоз ручку).
Як додатки вишли Мозаїк и Руске словечко, а на остатнїх бокох обявени Каталоґ кнїжкох хтори видала НВУ „Руске слово”.