РУСКИ КЕРЕСТУР − На порядней Рочней скупштини Здруженя спортских рибарох (ЗСР) ,,Колякˮ отриманей у Руским Керестуре на Лонґове внєдзелю вечар, винєшени звит о активносцох у прешлим року и планох за тот рок, як и финансийни звит з 2017.
На Скупштини предсидатель ЗСР ,,Колякˮ Михайло Пашо наглашел же Здруженє ма 105 членох − сениорох и ветеранох и 20 членох пионирох. Попри числених членох, на Скупштини присуствовали Владимир Олеяр спред Месней заєднїци, спред ЯКП ,,Рускомˮ Иґор Фейди и числени спонзоре котри помагаю Здруженє.
Од активносцох у прешлим року визначени роботи на полєшованю валалского лєшику, єдна гуманитарна акция, роботи на лєтнїковцу, порибйованє беґелю и орґанизованє штирох змаганьох.
У тим року плани и далєй унапрямени на полєшованє, орґанизованє змаганьох и вилєти на Дунай, а од марца розпочню роботи на лєтнїковцу за цо им Општина Кула обезпечела средства.
И попри нє вельких средствох, Здруженє прешлого року дїловало позитивно – рочни приход бул 107 400 динари, потрошене 96 344 динари, а дзекуюци проєкту з општини, донацийом и другим приходом на розполаганю маю ище коло 34 000 динари.
Членарина у Здруженю и надалєй остала иста − 500 динари, а безплатна є за пионирох. Цени рибарских допущеньох тиж остали нєпременєни − 6 000 порядна, а 3 000 динари пензионерска.
По законченю урядовей часци Скупштини, за шицких присутних була орґанизована вечера.
