РУСКИ КЕРЕСТУР − Порядну Рочну и виберанкову скупштину вчера у Руским Керестуре отримала и месна орґанизация Здруженя пензионерох, на котрей прилапени финансийни звит з 2017. року, наявени активносци за 2018. рок, а у виберанковей часци за предсидателя знова вибрани Ярослав Малацко.
Роботни звит з 2017. року и плани за 2018. рок представел предсидатель Ярослав Малацко, котри попри скромних финансийних можлївосцох и надалєй затримал квалитет. Здруженє будзе помагац при одходу на регабилитациї до купельох, при витворйованю правох з обласци социялней защити, а як и потераз, члени годни куповац огриву, поживово и други продукти на рати, та и по вигоднєйших ценох.
По финансийним звиту котри поднєсол дотерашнї касир Яким Рац, Здруженє у 2017. року витворело приходи од 442 055 динари, а розходи були 389 253 динари, так же до 2018. року вошли з 52 802 динарами у каси. Членарина и надалєй остала 300 динари, а по прешлорочней Одлуки и того року ше будзе давац дополнююци 100 динари як донация Здруженю, котре значну часц приходох витворює и з донацийох рижних привредних субєктох з котрима сотрудзує.
Месни одбор Здруженя пензионерох, предложел же би и у новим мандату функцию предсидателя окончовал Ярослав Малацко, за секретара предложени Михайло Фейди, а за касира Мелания Банич (родзена Рац), цо прилапене єдногласно.
Шицких присутних привитал и секретар Општинского здруженя пензионерох з Кули Стеван Раїч, котри у розгварки з керестурскима членами потвердзел же ше окреме завежнє за витворйованє правох пензионерох у шицких обласцох на уровню локалней самоуправи, о чим будзе вецей бешедоване на општинскей Рочней скупштини у Кули.
