КОЦУР – У Коцуре тих дньох орґанизована гуманитарна акция за Желька Шанту, школяра другей класи ОШ „Братство єдинство” з Коцура, котри муши пойсц на операцию очох до Русиї, за цо потребни 3 000 еври.
ОШ „Братство- єдинство“ шицким школом у вербаскей општини послала поволанку же би ше уключели до тей акциї, а сама Школа будзе орґанизовац гуманитарну журку за школярох, на хторей ше будзе зберац добродзечни прилоги. Школяре и сами приноша пенєжи и уручую их своїм учительом и одзелєнским старешином.
Окрем Школи, до гуманитарней акциї ше уключели и други културни и спортски здруженя у Коцуре, та ФК „Искра“ одбави єдно гуманитарне змаганє, а КУД „Звичайне врело“ у наступним чаше планує орґанизовац гуманитарни концерт.
Попри тим, у догварки з Месну заєднїцу, у шицких предавальньох СТР „Любоєвич“ поставени шкатули до хторих Коцурци можу дац добродзечни прилог за Желька.
Тиж так, и шицки людзе добрей дзеки, без огляду з хторого су места, поволани най ше уключа до тей акциї збераня пенєжу нєобходного за Желькову операцию, а донацию мож уплациц на жиро-рахунок Желькового оца: Тихомир Шанта, Банка Интеса, 160-5800101032234-53.