НОВИ САД – Руска редакция РТВ Войводини пририхтала емисиї по руски хтори патраче можу провадзиц и през швета.
У новорочней ноци, 31. децембра на 21,30 годзин почнє найновше, новорочне виданє заєднїцкей емисиї за младих „Пулс младих”, а термин за репризне емитованє 1. януар на 8 и 2. януара на 15,40 годзин.
Попри тим, 31. децембра од 22 до 00,10 годзин, будзе емитована уж традицийна заєднїцка новорочна програма на язикох националних заєднїцох, того року под назву „Новорочни приповедки”. У єй рамикох патраче годни одпатриц три музични точки по руски и интересантну пригодну приповедку хтору виприповеда Исо Планич. Реприза будзе 1. януара на 8,30 и 2. януара на 8 годзин.
У термину емисиї „Добри вечар, Войводино”, 3. януара, буду емитовани ексклузивни репортажи о означованю крачунских и новорочних шветох у Братислави и Бечу, як и о живоце наших людзох у тих городох, а такой потим, на на 21,30 годзин, будзе реприза ТВ Маґазина. Емисия „Добри вечар, Войводино” будзе репризно емитована 4. януара на 9 годзин.