КОЦУР – У Беоґрадзе, у Привредней комори Сербиї, Коцурске здруженє младих „КУМ“, пияток 12. януара, подписало контракт зоз Реґионалним центром Австриї зоз котрим будзе робиц на проєкту „Желєна школа” дзекуюци котрому ше будзе едуковац школярох и професорох о отримуюцим розвою и еколоґиї.
Конєчни циль того проєкту пририхтованє школярох же би по законченю штреднєй школи могли сами себе найц даяку роботу у обласци очуваня животного стредку.
Проєкт Здруженя „КУМ“ бул оценєти як єден зоз седем найлєпших проєктох на Балкану.
Проєкт ше почнє реализовац од фебруара, а у проєкту облапена и Основна школа „Братство єдинство“ зоз Коцура, як и Ґимназия „Петро Кузмяк“ зоз Руского Керестура.