НОВИ ПАЗАР – У Новим Пазаре, у шедзиску Националного совиту Бошнякох, нєшка, 12. мая, будзе схадзка Координациї националних совитох (НС) националних меншинох у Сербиї. Спред НС Руснацох на схадзки Координациї будзе присуствовац предсидатель Вивершного одбору НС Желько Ковач.
На нєшкайшей схадзки представителє НС-ох у Сербиї би мали утвердзиц принципи роботи Координациї и єй нормативно-орґанизацийного унапредзеня, состав фахових роботних целох Координациї по обласцох за Акцийни план за меншини, а на дньовим шоре и вецей звити представительох НС-ох у роботних ґрупох за вименки законох вязаних за национални меншини.
Будзе розпатране и запровадзованє Акцийного плану за меншини, звит о активносцох Координациї у обласци образованя на язикох националних меншинох, а на нєшкайшей схадзки би мала буц принєшена и одлука о пребераню предшедованя з Координацию. После рочного предшедованя НС Бошнякох, на чолє того цела би тераз мал буц Национални совит Мадярох у Сербиї.
Пред схадзку Координациї, єй члени вчера пополадню и вечар присуствовали на означованю 11. мая, Националного швета Бошнякох у Сербиї – Дню бошняцкей националней застави.