Фото: fifa.com
Гоч ше каждого року чека лєто и час кед ше идзе на розпуст, або рочни одпочивок, тогорочне лєто ше чека з окремну жажду. Любительох спорту, а окреме фодбалу, обчекує возбудлїви мешац – Шветове змаганє у фодбалу, хторе будзе отримане у Русиї од 14. юния по 15. юлий.
Урядова назва того змаганя то 2018 FIFA World Cup Russia, и то будзе першираз у историї фодбалу же ше отрима у Восточней Европи.
Отверанє змаганя плановане за 14. юний, и то зоз змаганьом медзи домашню Русию и Саудийску Арабию на стадиону Лужнїки у Москви, хтори може прияц 81 000 патрачох, док заверанє змаганя будзе 15. юлия, зоз финалним змаганьом двох найлєпших репрезентацийох, тиж так на стадиону Лужнїки.
Пре саму ґеоґрафску велькосц Русиї, а пре лєгчейши и швидши транспорт екипох, турнир будзе орґанизовани лєм у европскей часци Русиї. Домашнї городи буду: Москва, Санкт Петербурґ, Калїнинґрад, Казань, Нїжни Новгород, Самара, Волґоґрад, Саранск, Ростов, Сочи и Єкатеринбурґ.
На тим Шветовим першенстве буду участвовац 32 репрезентациї, хтори виборели пласман на турнир прейґ квалификацийох, хтори орґанизовани прешли два роки знука своїх континенталних фодбалских союзох – Конфедерацийох.
Любительом спорту зоз наших просторох окреме будзе интересантне тото змаганє, понеже фодбалска репрезентация Сербиї после осем рокох блуканя и нєприсуствованя на двох Европских и єдним Шветовим змаганю, конєчно виборела пласман, и як перша у своєй квалификацийней ґрупи пошла до Русиї.
Концом прешлого року, 1. децембра, у Москви у Кремлю, отримане вицагованє составох ґрупох.
КОНЄЧНИ ВИПАТРУНОК ҐРУПОХ ТАКИ:
А ґрупа: Русия, Саудийска Арабия, Єгипет, Уруґвай
Б ґрупа: Портуґалия, Шпания, Мароко, Иран
Ц ґрупа: Французка, Австралия, Перу, Данска
Д ґрупа: Арґентина, Исланд, Горватска, Ниґерия
Е ґрупа: Бразил, Швайцарска, Костарика, Сербия
Ф ґрупа: Нємецка, Мексико, Шведска, Южна Корея
Ґ ґрупа: Белґия, Панама, Тунис, Анґлия
Х ґрупа: Польска, Сенеґал, Колумбия, Япон
Зоз составох ґрупох мож видзиц же тото Першенство будзе моцне, и же ше за фаворитох видвоюю Портуґалия (у тей хвильки Европски шампион), Шпания (вше мала одличну репрезентацию), Нємецка (тераз Шветови шампион), Французка (одлично составена екипа, моцна на шицких позицийох), Арґентина (моцна екипа, зоз Месийом на чолє), Бразил (найуспишнєйша репрезентация у историї), а грожиц буду и други репрезентациї як цо Белґия, Анґлия, Горватска и так далєй.
КЕДИ НАШО РЕПРЕЗЕНТАТИВЦИ НАСТУПАЮ?
По плану и програми, Сербия наступи у першим колу зоз Костарику, 17. юния, на 13 годзин у Самари.
У другим колу, нашо фодбалере одмераю моци зоз Швайцарску, 22. юния, на 19 годзин у Калїнинґраду.
Остатнє, треце коло, наша репрезентация ма одбавиц процив шветовей фодбалскей сили Бразила, и тото змаганє на програми 27. юния на 19 годзин у Москви.
ЦО МОЖ ОБЧЕКОВАЦ ОД НАШИХ ФОДБАЛЕРОХ?
Наша репрезентация направела вельки успих и зоз самим участвованьом, за хторе ше виборела у чежкей квалификацийней ґрупи. Вшелїяк, нє треба буц задовольни лєм зоз зявйованьом у Русиї, дзе у ґрупи зоз Бразилом, Швайцарску и Костарику, наша екипа ма нагоду вибориц идуцу фазу на турниру.
Треба наглашиц и пременки хтори направени после квалификацийох, кед на месту селектора зменєни дотерашнї селектор Муслин, а заменєл го Крстаїч. Тота пременка виволала вельки полемики, и час укаже чи то бул прави поцаг.
Любителє фодбалу у єдним зложни – Бразил найлєпши у нашей ґрупи, док ше за друге место буду бориц Швайцарска и Сербия. Мож повесц же би успих наших фодбалерох бул пласман до нокаут фази того Шветового першенства.
Попри участвованя нашей фодбалскей репрезентациї, на тим Шветовим першенстве, Сербия будзе мац ище єдну екипу – судийску, на чолє зоз нашим найлєпшим судийом Милорадом Мажичом. То лєм ище єдно припознанє судийови Мажичови и його помоцнїком, хтори єдни од найлєпших европских судийских екипох, и хторим то будзе друге Шветове першенство, понеже уж судзели у Бразилу 2014. року.
Покля нє учуєме перши судийски пищок зоз Русиї, посиламе вам спортски поздрав.