КУЛА – Комисия за виробок Рочней програми защити, ушореня и хаснованя польопривредней жеми у державним власнїцтве за општину Кула розписала Явну поволанку за шицки физични и правни особи же би доказали основ права першенства арендованя державних поверхносцох за наступни 2019. рок.
Власнїки залївних системох, системох за одводньованє, рибаловох, польопривредних обєктох, склєняних заградох, пластенїкох и овоцнїкох и винїцох на державних польопривредних поверхносцох котри уписани у польопривредних ґаздовствох найменєй три роки, треба же би доказали основ першенства арендованя. Явна поволанка ше одноши и на статкарох котри власнїки, односно тоти котри закупюю обєкти на териториї општини Кула, а котрим статкарство у активним статусу польопривредного ґаздовства найменєй єден рок.
Документацию з котру ше доказує право першенства арендованя державней польопривредней жеми потребне придац до општинскей управи найпознєйше по 31. октобер того року.